Btdyt

I Fæti do 30 Zügno 1960 son i avvegnimenti che se sun svolti a Zena in seguito ao tentativo de organizzä in ta çittæ, Medaggia d'Ou da Rexistensa, o congresso do partio neofascista MSI.

Avvegnimenti precedenti[modìfica | modìfica wikitèsto]

O 19 Marso 1960, cheito o governo de Amintore Fanfani, che o l'aveiva çercou de preparâ l'ingresso di socialisti in ta coscidita stansia di pumelli, o prescidente da Repübblica Gronchi o l' incaregava o democristian Fernando Tambroni de formä unna noeuva compagine governativa. Tambroni o l'ea un esponente da scinistra DC, e o sò incarego o l' ea de formä un governo de tranxision in atteisa che e cose se definissen megio. Probabilmente sponciou dall'ambision de düä a lungo ao governo, Tambroni o çercava però de orientä decisamente a destra o sò governo. A solo 15 anni da a Liberaçion, o governo o vegniva coscì a rëzise in sce i voti do MSI, o partio neofascista. No solo, vegniva deciso che o congresso do MSI do 2, 3 e 4 Lüggio o se saieiva tegnüo a Zena; e che a presiedilo ghe saieiva stæto Emanuele Basile, o prefetto che ai tempi da Repübblica de Salò o l'aveiva organizzou a deportaçion di operai de Sestri Ponente o 16 Zügno 1944. Basile o l' ea sempre stæto scandalosamente assolto in te tütti i processi che in to doppoguæra s'ea tegnüo pe i delitti che o l'aveiva commisso.

25 Zügno[modìfica | modìfica wikitèsto]

O 25 de Zügno, contra o congresso fascista, ä mattin scioperava i portuali; in to pomeriggio i studenti universcitai se dirizzen da Ciassa Banchi verso o Ponte Monumentale pe pösä de sciôi ao sacraio di Cheiti Partigen. Improvvisamente partiva unna càrega da poliscia, i zoveni reagivan e comensava di scontri che düavan fin ä seia a 20 oe e 30. Questi primmi avvegnimenti innescavan a raggia contra a poliscia che a saieiva sccioppä in ti giorni succescivi.

28 Zügno[modìfica | modìfica wikitèsto]

O 28 de Zügno in mattinä o Comitato de donne antifasciste o votava un ordine do giorno che o domandava o scioglimento do MSI in base ä norma transitoria e finale XII da Costituçion italianna (norma tüttoua in vigore). Ao pomeriggio parteçipava paçificamente circa 30.000 personne ao comiçio de Sandro Pertini in ciassa da Vittoia.

30 Zügno[modìfica | modìfica wikitèsto]

O 30 do meise o l'ea o giorno do sciopero generale proclamou dä Camera do Travaggio; ae 15,30 partiva un grande corteo da ciassa da Nunçiä attraverso o centro da çittæ con destinaçion ciassa da Vittoia. Ao momento de sfollä, in ciassa De Ferrari partiva unna càrega, assolutamente gratuita, da poliscia che a dava o via a unn'atra serie de scontri restæ famoxi.

Conseguense[modìfica | modìfica wikitèsto]

In ta nötte fra o 1° e o 2 Lüggio o prefetto Pianese o l'avvisava che o congresso fascista o l'ea stæto annullou. In ti giorni successivi a protesta contra Tambroni a dilaggava da Zena a tütta Italia, con scontri che costaven anche di morti fra i manifestanti: a Reggio Emilia, a Rumma, in Sicilia. O 19 de Lüggio o governo Tambroni o se dimetteiva. Zena a l' aveiva dæto a spinta pe risolve unna situaçion de pericolo naçionale.

Bibliografia[modìfica | modìfica wikitèsto]

• A.G.Parodi: Le giornate di Genova – Editori Riuniti, Roma 1960.
• N.Bonacasa, R.Sensoni: Vite da compagni – Ediesse, Roma 1998