Miranduléś|
C'l artìcul chè 'l è scrit in
Miranduléś |
 Indestructible Man
| ||
| L'uomo che uccise il suo cadavere | ||
 La Marian Carr e Showalter in na figùra dal film | ||
| 'L óm ch'l à masâ 'l sò cadàvar 1956 | ||
|---|---|---|
| Regia: Jack Pollexfen | ||
| Scritùr: Vy Russell • Sue Dwiggins | ||
| Atùr: Lon Chaney Jr. • Max Showalter • Marian Carr Ross Elliott • Stuart Randall • Peggy Maley | ||
| Müsica: Albert Glasser | ||
| Lengua: Ingléś | ||
| Dürä dal film: 72 minüt | ||
| Nasiòṅ: Stat Unî | ||
Riproduci file multimedialeL'uomo che uccise il suo cadavere (’L óm ch'l à masâ 'l sò cadàvar) 'l è 'n film ad scarésa fantàstic dal 1956, girâ in biànc e négar, ad Jack Pollexfen ch'al 'l à anc prudót.
In di Stat Unî la pelìcula l'è stada distribuìda in di cìnema insém a Mondo senza fine 'd Edward Bernds.
Sunt
Al delinquènt e sasèṅ califurgnàṅ Charles Benton (Lon Chaney Jr.), ch'al s pòrta adrē al scutmàj ad "Butcher" (Maslàr) par via dla sò cativèria, dòp un cōlp ch'al gh'à frutâ siesènt-mila dòlar, al finìs in parśòṅ cundanâ a mòrt.
Al sò avucàt Paul Lowe (Ross Elliott), ch'al 'l iva jutâ in dla rapìna insém a dū atri canàj, al vōl prufitàr-as dla sò mòrt par fargàr-ag tut i bèsi ch'l iva lugâ prima 'd èsar ciapâ in dal canaléti 'd Los Angeles. Prima 'd finìr su la scrana lètrica, Benton al gh prumét ch'al turnarà par far-'g-la pagàr méntar c'l àt'r al gh rid adrē.
Dòp l'eśecusiòṅ al sò còrp al vîṅ vindû fóra da tut al règhli a 'n siensiâ ciamâ Bradshaw (Robert Shayne) ch'l al vōr druàr par di esperimènt par catàr na cura cónt'r al càncar. Druànd un machinàri ch'l à invintâ lò e dal scarghi lètrichi, al prufesōr al gh la cava a dar vita a 'l cadàvar faghénd-ag vgnir però na pèla acsè dûra che gnanc un raśōr o 'n sćiòp i èṅ bòṅ ad śbuśìr-la e anc na fòrsa 'd c'l àtar mónd.
Benton, ch'l à pardû la vóś parchè 'l scòsi i gh'aṅ bruśâ 'l còrdi vucàli, al cópa 'l dutōr e 'l sò asistènt (Joe Flynn), pò al tōś na màchina p'r andàr a catàr la sò muróśa, na biónda ciamàda Eva Martin (Marian Carr). Chi lē la tira avànti faghénd di spetaculèṅ spurcaciòṅ insém a la sò amìga Francine (Peggy Maley) in un night in du la s cava śò p'r i óm.
La dóna, quànd la 'l véd, l'è sicûra ch'al sia lò dabòṅ par via 'd un tatuàǵ ch'al gh'à su 'n bras ma ninsòṅ a gh créd quànd lē la próa a mént'r in guàrdia al capitàṅ 'd pulisìa John Lauder (Stuart Randall).
Charles al partìs p'r avēr la sò vindéta cóntar 'l avucàt ch'al 'l à tradî e in dal mént'r al cópa anc soquànt pulisiòt. A dar-ag la casa a gh pénsa 'l tenènt Dick Chasen (Max Showalter), 'n agìnt ch'l à butâ 'l òć anc lò su l’Eva dòp ch'al l'iva invidàda a magnàr un panèṅ insém dèntar la sò màchina 'd servìsi.
Culegamènt estéran
- (EN) La schéda dal film in s'l IMDb
- (IT) La schéda dal film in sal FilmTV